Vuelve Pint of Science: La Pola Siero estrénase na so participación nel mayor festival de ciencia en chigres del mundu

La Pola Siero súmase esti añu per primer vegada a una nueva edición de Pint of Science, un festival mundial gratuitu que va llevar la ciencia a los chigres los díes 18, 19 y 20 de mayu. Mientres estes trés xornaes, los establecimientos Florita Café Bar y The Clovers Irish Tavern en Llugones, xuntu al Molly Malone en La Pola Siero, van tresformase en centros de conocencia con un total de 18 charres científiques. L'eventu busca convertir estos espacios cotidianos en puntos d'alcuentru onde l'interés ciudadanu y el trabayu de los investigadores se xunan nun ambiente distendíu.

El programa na llocalidá va encetar temátiques tan diverses como la nanoteunoloxía, el cáncer, la xeoloxía o l'impautu de la radiactividá en Chornobyl. Ente los ponentes destaquen figures como Pedro Gorria Korres, Rosa M. Sainz y Germán Orizaola, que van compartir los sos avances n'árees como'l magnetismu o la "medicina del futuru". Dimas G. de Oteyza, investigador del CSIC y coordinador en Llugones, destaca qu'esta ye una oportunidá p'amosar qu'Asturies cunta con una comunidá científica viva y comprometida con compartir el so saber más allá de los llaboratorios. Ḷḷuarca, Xixón, Uviéu, y Mieres son les otres llocalidaes que repiten esti añu.


L'orixe y espansión d'un fenómenu global

El festival Pint of Science nació en mayu de 2013 nel Reinu Xuníu, impulsáu polos investigadores Michael Mostkin y Praveen Paul. La chispa surdió n'entamando una charra nos sos llaboratorios pa persones afectaes por enfermedaes mentales; énte l'ésitu de la convocatoria, plantegáronse que si'l públicu taba dispuestu a visitar los llaboratorios, los científicos teníen de llevar la ciencia a onde ta la xente: los chigres. Lo qu'empezó como una iniciativa llocal tresformóse nel eventu de divulgación científica más grande del planeta.
Pa 2026, el festival celébrase de manera simultánea en 27 países de los cinco continentes, siendo Australia'l puntu de partida d'esti maratón internacional. El so oxetivu didácticu ye frañar les barreres del llinguaxe téunicu y l'ambiente académicu formal, dexando que la sociedá interactúe direutamente colos espertos nuna redolada relaxada.

Consulta equí los programes de cada ciudá