El Principáu promueve una anovación integral del Aula Didáctica del Castru de Cuaña

La conseyera de Cultura, Política Llingüística y Deporte, Vanessa Gutiérrez, inauguró al meudía d'ayeri la remocicación del Aula Didáctica del Castru de Cuaña, tamién conocíu como Castriyón de Villacondide, tres d'una inversión cercana a los 200 mil euros. Gutiérrez destacó que “l'anovación total d'esti espaciu dexa divulgar meyor la nuestra historia y averala a visitantes y a los que vivimos equí, incorporando amás pieces orixinales ya inédites hasta'l momentu”.

Según nota de prensa de la conseyería, la titular de Cultura sorrayó que'l Castru de Cuaña ye “una pieza fundamental del patrimoniu arqueolóxicu asturianu y un exemplu de la política cultural del Principáu”, basada na planificación del caltenimientu ya investigación, el rigor científicu y la divulgación. “L'actuación nel Aula supunxo una inversión total de 195.000 euros y permitió acometer una puesta al día integral del equipamientu, tanto nel so edificiu como nos sos conteníos, col oxetivu d'ameyorar l'accesibilidá y atención al visitante”, señaló la conseyera.

El proyeutu desenvueltu nel Aula Didáctica permitió intervenir sobre un inmueble en funcionamientu dende 1993, adaptando de forma sustancial les sos condiciones d'usu. Ente les principales actuaciones figuren la reorganización de los espacios interiores, la modernización de los accesos y de los servicios d'acoyida al públicu, amás de l'actualización de les instalaciones p'ameyorar les condiciones tanto pa les persones usuaries como pal personal del centru.

En paralelo, llevóse a cabu una anovación completa del espaciu espositivu. El nuevu Aula Didáctica incorpora un discursu actualizáu qu'integra les meyores científiques derivaos de décades d'investigación arqueolóxica nos castros asturianos, especialmente nel área eonaviega. Esta actualización traduzse en nuevos paneles esplicativos, recursos gráficos, recreaciones y materiales divulgativos que faciliten la comprensión del xacimientu y del fenómenu castreñu n'Asturies.

La esposición permanente inclúi, amás, pieces arqueolóxiques procedentes del propiu Castru de Cuaña y d'otros enclaves cercanos, dalgunes d'elles inédites, que contribuyen a ufiertar una visión más completa de la evolución histórica d'estos asentamientos. El conxuntu sofítase nun llinguaxe visual anováu que dexa averar al públicu xeneral conteníos científicos complexos de manera accesible y didáctica.

La intervención amplía'l papel del Aula Didáctica como puntu de referencia pa la interpretación del xacimientu y como elementu clave p'ameyorar la esperiencia de les persones visitantes, nun enclave que constitúi ún de los principales activos culturales del occidente asturianu.