Bruxeles multa a Temu con 200 millones por nun controlar los riesgos de productos illegales na so plataforma

La Comisión Europea impunxo una multa de 200 millones d'euros a Temu por incumplir la Llei de Servicios Dixitales. Bruxeles conclúi que la plataforma nun evaluó afechiscamente los riesgos sistémicos venceyaos a la vienta de productos illegales dientro del so serviciu, magar tar obligada a faelo pola so condición de gran plataforma dixital. Según la Comisión, los consumidores europeos tienen una alta probabilidá d'atopar artículos illegales en Temu, incluyíos productos que pueden representar riesgos pa la seguridá.

La investigación señala que la evaluación de riesgos presentada pola empresa en 2024 nun se basó en datos concretos de la so propia plataforma, sinón n'información xeneral del sector. Arriendes de la sanción económica, Bruxeles desixe a Temu que presente enantes del 28 d'agostu de 2026 un plan con midíes pa correxir estos defeutos. La Comisión alvierte de que, si la empresa nun adopta soluciones eficaces, podría enfrentase a nueves multes periódiques