Movilidá abre espediente sancionador a la empresa Uber por emprestar servicios urbanos ensin autorización

Sólo 9 díes dempués de la so entrada n'Asturies, la Conseyería de Movilidá, Mediu Ambiente y Xestión d'Emerxencies abrió un espediente sancionador a la empresa Uber pola prestación de servicios de tresporte urbanu ensin la preceptiva autorización.

La normativa vixente establez que les autorizaciones de vehículos de tresporte con conductor (VTC) tienen calter puramente interurbanu, lo que supón que namái puen facer servicios que'l so orixe y destín entepasen del ámbitu urbanu, sacantes les esceiciones previstes na llexislación pa determinaos contratos de, polo menos, dos díes de duración.

Les inspeiciones feches pol área de Tresportes de la conseyería detectaron fechos que podríen ser constitutivos d'una infracción pergrave conforme a la normativa estatal y a la Llei de Movilidá Sostenible d'Asturies, al constatar que la empresa ta emprestando servicios de tresporte de viaxeros con orixe y destín dientro del mesmu conceyu.

Esti fechu vien espresamente acutáu na norma autonómica aprobada en 2018. En concretu, los posibles incumplimientos afectaríen a lo dispuesto nel artículu 140 de la Llei d'Ordenación de los Tresportes Terrestres y a la normativa autonómica en materia de tresporte y movilidá sostenible.