Cultura llanza 'Alfaya', el nuevu distintivu pa reconocer l'usu del asturianu y l'eonaviegu nel mundu empresarial

La Conseyería de Cultura y Política Llingüística dio un pasu fundamental pa la normalización de les llingües propies d'Asturies col espardimientu del sellu Alfaya, marca asturiana d'usu llingüísticu. Esti preséu, reguláu yá al traviés d'una resolución publicada nel BOPA'l pasáu 20 de marzu, tien como fin principal reconocer y dar visibilidá al compromisu de les empreses, profesionales y autónomos col asturianu y el gallego-asturianu o eonaviegu.

Un distintivu pa tolos sectores

L'oxetivu d'esta iniciativa ye que les llingües propies tean presentes en tolos ámbitos de l'actividá económica, dende la rotulación y l'etiquetáu hasta la comunicación corporativa y les redolaes dixitales. Dende la Conseyería nun pretenden que'l sellu seya solo un reconocimientu simbólicu, sinón una ferramienta pa reforzar la identidá y la diferenciación de les empreses asturianes nel mercáu.

Tres niveles de compromisu

La normativa establez una escala de tres niveles pa que cada entidá s'asitie según el so grau d'implicación real col idioma:
Nivel 1 o inicial: Acreita la voluntá de la empresa de dar visibilidá al usu de les llingües propies na so actividá.
Nivel 2 o intermediu: Reconoz un usu parcial pero siguíu del asturianu o eonaviegu n'elementos como publicidá, redes sociales o atención al cliente.
Nivel 3 o d'escelencia: Esti grau máximo acútase pa les empreses qu'integren plenamente les llingües nes sos comunicaciones esternes y internes. Les entidaes que llogren esti nivel van tener una promoción destacada na web de la Conseyería y van poder actuar como "mentores llingüísticos" pa otres empreses y profesionales.

¿Cómo solicitar el sellu?

El procedimientu pa consiguir el distintivu ta yá abiertu y puede facese de forma online al traviés de la sede electrónica del Principáu d'Asturies directamente dende esti enllaz.

Pa les persones xurídiques, la solicitú ye obligatoriamente electrónica, mientres que los autónomos pueden emplegar otres víes oficiales. El plazu de presentación permanecerá abiertu de forma permanente.