L'aeropuertu d'Asturies consolídase como noyu clave del Cantábricu

L'Aeropuertu d'Asturies, conocíu popularmente como Ranón pol so allugamientu en Santiagu'l Monte, vivió una evolución positiva bien marcada nes postreres dos décades.

Tres xorrecer con fuerza nos años 2000 hasta superar 1,5 millones de pasaxeros en 2007 y 2008, sufrió un llargu estancamientu mientres la crisis económica y darréu l'andanciu del COVID-19. Dende 2019 entró nuna nueva fas espansiva impulsada pola estratexa de conectividá d'Asturies y la llegada de nueves rutes internacionales. En 2023 y 2024 encadenó récords históricos y en 2025 superó per primer vegada los dos millones de viaxeros, algamando 2,05 millones de pasaxeros.

Nel norte d'España los sos principales competidores son los aeropuertos de Bilbao y Santiago-Rosalía de Castro; en menor midida los de Santander-Seve Ballesteros, La Coruña, Vigo y San Sebastián. De toos ellos, el de Bilbao xuega claramente n'otra lliga con más de siete millones de pasaxeros y un fuerte pesu internacional y empresarial, anque Santiago-Rosalía de Castro mueve 3,12 millones, una cifra bien considerable. Los demás superen escasamente'l millón o, San Sebastián, queda mui embaxo d'esa cantidá.

Asturies paez afitar una posición bien sólida pal so tamañu, siendo'l principal aeropuertu uniprovincial del norte cantábricu y unu de los que más espolletó proporcionalmente dende l'andanciu. La so principal debilidá sigue siendo la dependencia del tráficu nacional y l'ausencia de grandes rutes internacionales permanentes. En Ranón, operen anguaño diez compañíes: Aer Lingus, Air Europa, Binter Canarias, European Airlines, Iberia, K.L.M. Royal Dutch Airlines, Lufthansa, Smartwings, Volotea y Vueling Airlines.