Les solicitúes pa entrar n'EEXX pal Mundial 2026 algamen cuasi los 6 millones

A piques d'entamar el Mundial 2026, l'eventu deportivu ta poniendo a preba la maquinaria migratoria d'Estaos Xuníos. Esti organismu ta funcionando ensin fuelgu por una marea humana ensin precedentes. La Oficina d'Aduanes y Proteición Fronteriza lleva tramitaes más de 5,9 millones de solicitúes d'autorización de viaxe -ESTA- empobinaes al Mundial 2025 y de les que 5 millones yá recibieron lluz verde. El Sistema Electrónicu pa l'Autorización de Viaxe conocíu como ESTA (n'inglés, Electronic System for Travel Authorization) ye un permisu dixital obligatoriu que sustitúi la visa tradicional pa viaxar a EEXX por turismu o negocios.

El fluxu ta llideráu nidiamente por aficionaos del Reinu Xuníu, Francia y Alemaña, mientres que les embaxaes estauxunidenses doblen los esfuercios col sistema FIFA PASS, una vía prioritaria cola que cerca de 12.000 hinches con entrada en mano yá axilizaron les sos cites consulares pa safar los severos peaxes de la visa tradicional. En paralelo, y énte la previsión d'un colapsu nes terminales aeroportuaries, más de 1,6 millones de viaxeros volcáronse a solicitar programes de cruz rápidu como Global Entry, configurando un ruempecabeces lloxísticu percomplexu que busca blindar la seguridá de les fronteres ensin apagar la fiesta del tornéu deportivu más grande del planeta. Global Entry ye un programa del gobiernu norteamericanu xestionáu pola Oficina d'Aduanes y Proteición Fronteriza (CBP) y diseñáu pa entainar l'ingresu de viaxeros frecuentes de baxo riesgu al país.