Netanyahu defende l'actuación de la Policía israelina al bloquiar al representante de la Ilesia Católica de Xerusalén

El primer ministru israelín, Benjamin Netanyahu, sofitó la decisión policial de torgar al patriarca llatinu de Xerusalén, Pierbattista Pizzaballa, aportar al Santu Sepulcru pa la misa del Domingu de Ramos. Según la versión, l'actuación respondió puramente a motivos de seguridá nel contestu de la guerra con Irán, énte'l riesgu d'ataques con misiles na zona de la Ciudá Vieya.
El Gobiernu aportuna en que la midida nun tuvo intención contraria y que s'aplicó pa protexer tantu a líderes relixosos como a fieles. L'incidente produzse nun contestu escepcional: los principales llugares sagraos de Jerusalén permanecen acutaos por razones de seguridá, y les celebraciones de Selmana Santa fueron llindaes o cancelaes. Inclusive actos tradicionales como la procesión del Domingu de Ramos suspendiéronse o amenorgaron significativamente, reflexando un clima d'alta tensión rexonal. Sicasí, la decisión xeneró un fuerte alderique. El Patriarcáu Llatinu considera que la midida foi desproporcionada, una y bones la ceremonia prevista yera quitada y cumplía coles restricciones vixentes.
Amás, dellos diputaos israelinos cuestionaron la llegalidá del bloquéu, señalando qu'esistía coordinación previa y que nun se superaben les llendes d'aforu dexaos. A nivel internacional, la reacción foi crítica y rápida. Gobiernos como los d'España, Francia ya Italia denunciaron xuna vulneración de la llibertá relixosa, ente que'l presidente israelín, Isaac Herzog, adoptó un tonu más conciliador y espresó el so pesar polo asocedío. Tamién líderes relixosos y el mesmu Vaticanu amosaron esmolición poles dificultaes de los cristianos pa practicar la so fe na rexón. Otros medios añeden matices qu'amplíen el discutiniu : dalgunos cuestionen la xustificación de seguridá al nun haber pruebes concluyentes d'ataques empobinaos a llugares de cultu, ente qu'actores palestinos y parte de la oposición israelina califiquen el fechu como un precedente grave contra el statu quo relixosu en Jerusalén. Coles mesmes, l'Executivu israelín prometió buscar fórmules pa dexar les celebraciones de Selmana Santa nos próximos díes, intentando contener l'impactu diplomáticu del episodiu